“Ҳоким ва ёшлар” учрашуви

Бугун вилоят  Маънавият ва маърифат марказида вилоят ҳокими Жўрабек Рахимов иштирокида “Ҳоким ва ёшлар” учрашуви ўтказилди.  Тадбирга ўқиш ва иш фаолиятида юқори натижаларга эришган, ўзининг юксак билими ва салоҳияти билан Ватанимиз тараққиётига  муносиб ҳисса қўшиб келаётган фаол ёшлар таклиф қилинди. 

Вилоят ҳокими жорий йил бошида ўтказилган шундай учрашувда иқтидорли ёшларни қўллаб-қувватлаш борасида билдирилган ташаббуслар ижроси ҳақида тўхталди. Жумладан, аниқ ва табиий фанлар бўйича  “Ҳоким олимпиадаси” ўтказилганлиги, ўқувчи ва талабалар учун “Вилоят ҳокими стипендияси”   ҳамда  IT соҳасида “Ҳоким гранти”  жорий қилингани ёш иқтидор эгаларини кашф этишда муҳим омил бўлганлигини таъкидлади. Эҳтиёжманд ёшларни қўллаб-қувватлаш, уларни касбга йўналтириш ва бандлигини таъминлаш мақсадида “Ёшлар дафтари” тизими орқали   30 минг нафарга яқин ёшларга ёрдам  кўрсатилди.

Вилоят ҳокими келгуси 2024 йилда ёшларга оид сиёсатни амалга ошириш борасида бир қатор янги ташаббусларни илгари сурди. Жумладан, нуфузли хорижий олий таълим муассасаларига бакалавриат ва магистратура йўналишлари бўйича ўқишга қабул қилинган 10 нафар қизларнинг сафар харажатлари қоплаб бериш,   ёшларнинг бўш вақтини мазмунли ташкил этиш мақсадида  “Тупроққалъа фест” лойиҳасини амалга ошириш, чекка ҳудудларида жойлашган 26 та маҳаллада ёшлар учун спорт объектлари қуриш тўғрисидаги таклифлар тадбир иштирокчилари томонидан қизғин кутиб олинди. Шунингдек, “Заковат” ўйинлари бўйича “Вилоят ҳокими лигаси”, “Хоразм шахмат чемпионлари” турнирларини ўтказиш,  IT соҳасида энг кўп ёш дастурчиларни тайёрлашга кўмаклашган  ёшлар етакчиларини рағбатлантириш каби таклифлар қўллаб-қувватланди.

Бир гуруҳ фаол ёшлар вилоят ҳокимининг ташаккурномаси ва совғалари билан тақдирланди, илғор мактаблар кутубхоналарига китоблар жамланмаси топширилди.


Izoh qolidrish