Оилавий поликлиникаларда аҳвол қандай?

Бугунги  кунда аҳолига бирламчи тиббий хизмат кўрсатиш асосан оилавий поликлиникаларда амалга оширилмоқда. Аммо барча оилавий поликлиникаларда ҳам бу жараён талаб даражасида йўга қўйилган деб бўлмайди. Шовот  тумани  Катқалъа қишлоғида жойлашган  54-сон оилавий поликлиникада бўлган ҳар бир фуқаро муассасада тиббий маданият, санитария-гигиена талабларига етарлича эътибор қаратилмаётганига гувоҳ бўлади.  Аввало поликлиника ҳамшираларининг иш жараёнида уй кийимларида юриши, дори-дармон воситаларини сақлашда белгиланган талабларга риоя этилмаётгани  маълум бўлди. Муассасада дори воситаларини сақлаш учун оддий  совутгич   ҳам йўқ. Поликлиника мудираси кундузги стационар деб кўрсатган жойда  эркагу-аёл, ёш болалар барчаси бир хонада муолажа олишяпти. Шифокорлар хонасида ювуқсиз идишлар, кўрпача ва палослар қалашиб ётибди. Маҳалла аҳолиси патронаж ҳамширалари ўз вақтида хонадонларга кирмаётганини айтишди. Оилавий поликлиника  19 минг нафар аҳолига хизмат кўрсатиши боис, шифокорлар қабулида аксарият ҳолларда навбат кутишга тўғри келади.

Оилавий поликлиникадаги ушбу ҳолат юзасидан вилоят соғлиқни сақлаш бошқармаси мутасаддилари томонидан ўрганиш ишлари олиб борилиб камчиликларнинг бир қисми бартараф этилгани,  яқин кунларда Бешмерган маҳалласида оилавий поликлиниканинг филиалини очиш режалаштирилаётганини маълум қилишди.

 Хоразм вилояти ҳокимлиги матбуот хизмати