Янгиариқ туманидаги “Қўриқтом” маданият марказида вилоят ҳокими Фарход Эрмановнинг навбатдаги сайёр қабули ўтказилди.

Фуқароларнинг ҳаётий муаммо ва эҳтиёжларини ҳал этиш, аҳоли билан очиқ, тўғридан тўғри мулоқотларни кучайтириш бугунги куннинг муҳим вазифаларидан биридир. Қолаверса,бу жарён ҳар бир раҳбарга алоҳида масъулият юклаб, халқ дарди билан яшаш, муаммоларга ечим излашга ундайди.

Вилоят ҳокими Фарход Эрмановнинг Янгиариқ туманидаги “Қўриқтом” маданият марказида ўтказилган навбатдаги сайёр қабулида фуқароларнинг, жумладан, ёшларнинг  турли соҳаларга оид муаммолари, талаб ва таклифлари эшитилди. Қабул чоғида фуқароларнинг қонуний манфаатларини ҳимоялаш, уларни қийнаётган муаммоларни бартараф этиш, адолатни қарор топтиришга эътибор қаратилди.

Аҳолининг моддий ёрдам, даволаниш, ишга жойлашиш, банклардан кредит олиш,тадбиркорлик фаолияти билан шуғулланиш, уй-жой таъминоти масалалари бўйича 80 дан ортиқ мурожаатлари бирма-бир муҳокама қилинди.Ҳар бир мурожаат бўйича дахлдор бошқарма ва ташкилотлар раҳбарларига аниқ топшириқлар берилди. Қабул давомида кўтарилган масалаларнинг бир қисми шу жойнинг ўзида ечимини топди,қолганларини мутахассислар иштирокида ўрганиб чиқиш ва амалий ёрдам бериш чора-тадбирлари белгиланди.

Хоразм вилояти ҳокимлиги матбуот хизмати