Барча жойда бўлгани каби вилоятимизда ҳам Иккинчи жаҳон уруши қатнашчилари ҳолидан хабар олиниб, уларга ҳурмат эҳтиром кўрсатилмоқда. Вилоят ҳокими Жўрабек Рахимов кенг жамоатчилик вакиллари иштирокида уруш фахрийлари - Урганч шаҳрида яшовчи Собир ота Қурбонов, қўшкўпирлик Вафо ота Искандаров, гурланлик Бобожон ота Мадаминов хонадонида бўлиб, уларга муҳтарам Президентимизнинг 9 май - Хотира ва қадрлаш куни ҳамда Иккинчи жаҳон урушида қозонилган ғалабанинг 79 йиллиги муносабати билан йўллаган табригини ўқиб эшиттирди, 20 млн сўм миқдоридаги пул мукофоти ҳамда қимматбаҳо совғаларни топширди. Юз ёш билан юзлашиб, ҳаётнинг барча аччиқ-чучугини тотган бу табаррук нуронийлар бундай эътибор учун ҳурматли Президентимизга самимий миннатдорчилик билдириб, юртимиз тинчлигини тилаб дуога қўл очдилар. Хотира ва қадрлаш кунига бағишланган тадбирлар вилоятимиз шаҳар ва туманларида, меҳнат жамоаларида давом этмоқда.
Хоразм вилояти ҳокимлиги матбуот хизмати
