Хоразм вилоят ҳокимлиги, Ўзбекистон Республикаси Маданият вазирлиги, Туризмни ривожлантириш давлат қўмитаси ва бошқа ташкилотлар ҳамкорлигида ўтказилаётган фестивалнинг очилиш маросими Хива шаҳридаги “Ичан-қалъа” давлат музей-қўриқхонасида бўлиб ўтди. Фестивалнинг очилиш маросимида Хоразм вилояти ҳокими Ф.Эрманов, Польша Республикасининг Ўзбекистондаги Фавқулодда ва мухтор элчиси Петр Ивашкевич хамда Озарбайжон Республикасининг Ўзбекистондаги элчихонаси қошидаги Гейдар Алиев номли маданият маркази раҳбари ўринбосари Зейналов Полад Мансур ўғли сўзга чиқди. Тантанали очилишидан сўнг, барча меҳмонлар ва иштирокчилар “Ичан-қалъа”нинг "Ота дарвоза"сидан ичкарига ташриф буюришди. 
Турли давлатлар номланиши билан ўтган саф, республиканинг ҳудудини намоён этувчи либослардаги раққосалари “Ичан-қалъа”да юриши барчани лол қолдирди. Ансамбль жамоаларининг чиқишлари сайёҳлар ва томошабинларни рақсга чорлаб, завқ бағишлади. – Ўзбекистоннинг ўзига хос рақс санъати бор ва ундаги ҳар бир ҳаракат кишини ўзига жалб этмасдан қолмайди, – дейди хидистонлик раққоса Патра Синхи. – Сизларнинг жаннатмакон юртингиз ва сехрли рақсларингизни телевизор орқали кўрганман. Бугун эса шундай фестивалда қатнашаётганимдан ниҳоятда хурсандман. Рости, миллий рақсларингиз жозибасидан сеҳрланиб қолдик гўё. Фурсатдан фойдаланиб, ҳамроҳларим билан бирга рақсларингизнинг айрим ҳаракатларини ўрганамиз. Бу ердан олган таассуротларимизни ўз юртимизда яқинларимизга албатта сўзлаб берамиз. Фестивалда юртимизнинг турли ҳудудлари ва қатор хорижий давлатлардан келган санъаткорлар ўз бадиий чиқишлари билан иштирок этмоқди. 
Миллий рақс санъатимизни дунёга тарғиб қилиш, мамлакатимизда туризмни янада ривожлантириш мақсадида ташкил қилинган фестивалга жорий йилда ҳам пухта тайёргарлик кўрилди. Рақс сеҳри Халқаро фестивалида 20га яқин мамлакатдан 100дан зиёд меҳмонлар ва бадиий жамоалар иштирок этмоқда. 
Хоразм вилоят ҳокимлиги Матбуот хизмати