Вилоят маънавият ва маърифат марказида бўшаб қолган ўринга Ўзбекистон Республикаси Олий Мажлиси Сенати аъзоси сайловини ўтказиш бўйича Хоразм вилоятидаги халқ депутатлари вилоят, шаҳар ва туманлар Кенгашлари депутатларининг қўшма мажлиси бўлиб ўтди.
Қўшма мажлисни Ўзбекистон Республикаси Марказий сайлов комиссияси аъзоси Суяржан Курбонкулов очиб берди ва сўзга чиқди.
Қўшма мажлисга раислик қилиш учун халқ депутатлари Хоразм вилояти Кенгашига 19-Қўшкўпир сайлов округидан сайланган депутат Алтибай Раджабов сайланди.
Унда Хоразм вилояти шаҳар ва туманлар маҳаллий давлат ҳокимияти вакиллик органларига сайланган депутатлар, фаоллар ва оммавий ахборот воситалари иштирок этишди.
Ўзбекистон Республикаси Олий Мажлиси Сенати аъзоси сайлови тўлиқ давлатимиз қонунчилиги талабларига асосан, хусусан “Ўзбекистон Республикаси Олий Мажлисига сайлов тўғрисида”ги Ўзбекистон Республикаси Қонуни, Ўзбекистон Республикаси Олий Мажлиси Сенати аъзоларини сайлаш тартиби тўғрисида”ги Низомларига мувофиқ ўтказилди.
Яширин овоз бериш орқали ўтказилган сайлов натижаларига кўра Хоразм вилояти ҳокими Эрманов Фарход Уразбоевич Ўзбекистон Республикаси Олий Мажлиси Сенати аъзолигига сайланди.