Айни кунларда вилоятимиз ҳудудида ҳаво ҳароратининг кескин пасайганлиги туфайли вилоят ҳокими Жўрабек Рахимов ҳар куни шаҳар ва туманларга чиқиб кўп қаватли уйлар, тиббиёт муассасалари, мактабгача таълим ташкилотлари ва умумтаълим мактабларининг иситилишини шахсан назорат қилмоқда. Вилоят ҳокими бугун вилоят руҳий асаб касалликлари шифохонаси, Урганч тумани Чолиш ҳудудидаги 46-сонли умумтаълим мактаби ва 5-сонли мактабгача таълим ташкилотининг иситиш тизимларини кўздан кечирди, шунингдек "Хоразм иссиқлик манбаи" давлат унитар корхонасига қарашли қозонхоналар орқали кўп қаватли уйлар ва ижтимоий соҳа объектларига иссиқлик энергиясини етказиб беришнинг аҳволи билан танишди. Бугунги кунда ушбу корхонага қарашли 94 та қозонхона орқали 333 та кўп қаватли уй ва 166 та ижтимоий соҳа объектларига иссиқлик энергияси етказиб берилмоқда.
Шу ўринда фуқароларимиздан коммунал хизматлар билан боғлиқ муаммоли масалаларни тезкор ҳал қилиш учун вилоят, шаҳар ва туман ҳокимликлари қошида туну- кун узлуксиз ишлаётган махсус штабларга 223-02-55 ва 10-55 қисқа рақамли телефонлар орқали мурожаат қилишларини сўраймиз.
Хоразм вилояти ҳокимлиги матбуот хизмати